1Cor 13 | GAM | STEP | Na una kandjine kayekaye djino, mo na tau agelo kandja djinj mal embe djino ba alla, na una boll kane wopake nayeno ge, na iko bine mal to guno kiwa djino, mo belle mal embe kallngane kiwa yenaka una kamallne boya.

1 Corinthians 13

Nono una kane wopake yembon mambine

1 Na una kandjine kayekaye djino, mo na tau agelo kandja djinj mal embe djino ba alla, na una boll kane wopake nayeno ge, na iko bine mal to guno kiwa djino, mo belle mal embe kallngane kiwa yenaka una kamallne boya. 2 Na kandja propet djinj mal embe djino. Wal seke paro ge na pille kune yeno. Na wal porapora pille kune yeno. Na pillgi kerman pandaka, na kamkimb djinaka kaima po er punda. Na wal embe ye kune yeno ba alla na una boll kane wopake nayell dal, na una kiwa dal moyo. 3 Nanam wal porapora yero ge ipo una kane nanonj una moye al auno. Nanam gaklena ipo opa aunaka una gale sege yene. Na wal embe yeno ba alla na una boll kane wopake nayell dal, wal yeno ge koas kol yeno.

4 Iwa ta una boll kane wopake yenda ge, une embe mal moya. Une kumbe ke ola dje nainda, une kiye dje moya. Une una boll wopake ye aundaka, una wal merke moya ba une kane ke nayenda. Une penang nayenda, yene kandjiye amblo pla naworda. 5 Une kandja napille geke bolo nayenda, na we dje pille kane nayenda. Una wo ye ke ye aune ba, une ola dje elle kumbso nawo, napille moya. 6 Singare ke paro mal une wopake napiya, ba alla singare du dje paro ge, une wopake piya. 7 Wal imb panda ba une seke napunda. Une pillgi dje molo, God na kaima aunda dje kanmoya. Wal ke porapora une boll wonda ba une aglo gi dje moya.

8 Nono una boll kane wopake ye aunmon singare embe ge, pora nadinda, pa moya. Ba una kandja propet djinj mal, ge pora djinda. Alla una kandjine kayekaye djinj ge, pora djinda. Pi una nomane al wal kerman kerman piye ge, pora djinda, namoya. 9 Namoya we djindo ge, me embe mal paro. Nono nomane al wal kerman pirmon ge, tuge yem ge pirmon, boll boll napirmon. Kandja propet dje aunmon ge tuge yem ge djinmon, tuge yem ge napirmon. 10 Ba alla ege pora djinda poke ge, nono wal tuge yem pirmon ge, aike pora djinda. 11 Ge embe mal paro. Na womba moll kune ge, na womba djinj mal embe djill. Womba pille yei mal na embe yell. Ba alla are na iwa kerman mal moll kune ge, na womba molo yell mal ge alla kerill. 12 Ipon ge, nono God kane kune nayenmon. Glas ke yenda al, nonekne gumane djillakene al kanmon ba emill dal yendo. Embe mal kane kune nayenmon, ba are ege ta yenda kune ge, nono God gume djillake kane kune yembon. God nono kane kune yendo mal embe, nono une kane kune yembon. 13 Alla ipon, wal sokara paro, pora nadjinda. Ta nono pillgi djinmon mal ge, ta God kaima yenda dje pille tau mormon mal ge, pi ta nono una boll kane wopake ye aunmon mal ge. Wal sokara paro ge, ta ge asamoll kaima paro. Ge nono una boll kane wopake ye aumbon.